- សូមនសិកាចំពោះព្រះរតទាំងបីមានព្រះពុទ្ធ ព្រះធម្ម ព្រះសង្ឃដោយសេចក្ដីជ្រេះថ្លា។
- ជាបឋមយើងខ្ញុំម្ចាស់សូមក្រាបថ្វាយបង្គំដល់ ព្រះថេរានុថេរៈ ទាំងពីរគណៈជាទីសក្ការៈ!
- សូមក្រាបថ្វាយបង្គំ ព្រះករុណា ជាព្រះអង្គម្ចាស់ជីវិតតម្កល់លើត្បូង ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីខ្ពង់ខ្ពស់បំផុត!
- សូមគោរព សម្ដេចអគ្គមហាសេនាធិបតីតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា និង លោកជំទាវកិត្តិបណ្ឌិត ប៊ុន រ៉ានី ហ៊ុន សែន ដែលជាប្រធានកាកបាទក្រហមកម្ពុជាជាទីគោរព!
- សូមគោរពសម្ដេច ឯកឧត្តម លោកជំទាវ អ្នកឧកញ៉ា លោកឧកញ៉ា អគ្គរាជទូត រដ្ឋទូត អង្គទូត លោក លោកស្រី អ្នកនាង កញ្ញា ព្រមទាំងភ្ញៀវកត្តិយសទាំងអស់ជាទីគោរព។
- សូមគោរព មន្រ្តីរាជការ លោកតា លោកយាយ លោកគ្រូ អ្នកគ្រូ លោកពូ អ្នកមីង និងប្អូនៗ សិស្សានុសិស្សទាំងអស់ដែលមានវត្តមាននៅទីនេះជាទីមេត្រី។
ថ្ងៃនេះ ជាថ្ងៃដ៏មហានក្ខត្តឫក្សឧត្ដុង្គឧត្ដមបំផុត ទូលបង្គំពិតជាមានភាពសោមន្សរីករាយជាខ្លាំង និងមានកត្តិយសបំផុតដែលបានចូលរួមនៅក្នុងកម្មវិធីដ៏ឧឡារិក្សមួយនេះ។ យើងខ្ញុំសូមសម្ដែង នូវមនោសញ្ចេតនារំភើប រីករាយប្រកបទៅដោយតញ្ញូតាធម៍ដ៏ជ្រាលជ្រៅបំផុត ដែលមានវត្តមានរបស់ ព្រះករុណា ព្រះបាទ ព្រះបរមនាថ នរោត្តម សហមុនី យ៉ាងខ្ពង់ខ្ពស់ជាទីសក្ការៈ ដែលបានចូលរួម ជាអធិបបតីភាព ក្នុងការប្រារព្ធកម្មវិធីសម្ភោធ សាលាអន្តរជាតិឡៃហ្គ័រ ដែលមានទីតាំងស្ថិតនៅ ភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ដែលជាអំណោយដ៏ថ្លៃថ្លារបស់ លោកត្រេវឺរ ហ្គីល (Trevor Gile)។
យើងខ្ញុំពិតជាមានចិត្តសោមន្សរីករាយ ត្រេកអរជាខ្លាំង ដោយបានទទួលបានអំណោយដ៏មហិមានេះ។ សាលាអន្តរជាតិឡៃហ្គរ័មានអគារសិក្សាសំរុបចំនួន២ខ្នង។ ក្នុងនោះអគារទី១ មានបន្ទប់រៀនចំនួន ៤បន្ទប់សំខាន់ៗ រួមទាំងនោះមានដូចជា ថ្នាក់អក្សរសាស្រ្តខ្មែរ ថ្នាក់គណិតវិទ្យា ថ្នាក់រូបវិទ្យា និងថ្នាក់អក្សរសាស្រ្តភាសាអង់គ្លេស។ មិនតែប៉ុណ្ណោះ នៅក្នុងអគារទី២ រួមមានបន្ទប់ពិសោធន៍វិទ្យាសាស្រ្ត បន្ទប់នវកម្ម បន្ទប់វិស្វកម្ម និងបន្ទប់រចនាកំព្យូទ័រ។ អ្វីដែលអស្ចារ្យនោះគឺ ក្រៅពីមានអគារសិក្សាដ៏ល្អផូរផងនោះ សាលាអន្តរជាតិឡៃហ្គរ័ក៏មាន ទីកន្លែងស្នាក់នៅសម្រាប់លោកគ្រូ អ្នកគ្រូដែលមានសញ្ជាតិផ្សេងៗពីគ្នាផងដែរ។ លើសពីនេះទៅទៀត សាលា ក៏មានទីកន្លែងស្នាក់នៅរបស់បុគ្គលិក និងគេហដ្ឋានរបស់សិស្សានុសិស្ស ចំនួន២កន្លែងថែមទៀតផង។
សាលាអន្តរជាតិឡៃហ្គរ័គឺជាសាលាក្រៅរដ្ឋាភិបាល ដូចនេះកម្មវិធីសិក្សារបស់សាលា មានភាពខុសគ្នាទៅនឹងសាលារដ្ឋ។ ចំណែកឯគោលដៅរបស់សាលាវិញ គឺចង់ឃើញសិស្សានុសិស្សនៅទីនេះ និងកូនខ្មែរជំនាន់ក្រោយធ្វើឲ្យប្រទេសរបស់ពួកគេមានការអភិវឌ្ឍនិងរីកចម្រើន។ ជាងនេះទៅទៀត សាលាក៏មានគោលបំំណងឲ្យសិស្ស ក្លាយទៅជាពលរដ្ឋល្អក្នុងសង្គម ចេះគោរពមនុស្សជុំវិញ និងជួយអ្នកដទៃក្នុងពេលអាសន្ន។ អ្វីដែលអស្ចារ្យនោះគឺ សាលាមានការសិក្សាជាគម្រោង ដោយផ្ដល់ឪកាសដល់សិស្សានុសិស្សទាំងអស់បានចុះកិច្ចសិក្សាទៅឯខេត្តនាៗនៃប្រទេសកម្ពុជា ហើយប្រទេសមួយចំនួនទៀតនៅក្នុងសកលលោក។
បើយើងក្រលេកទៅមើលចំនួនសិស្សានុសិស្សរបស់សាលាវិញ គឺមានតែ ៥០នាក់ប៉ុណ្ណោះដែលក្នុងមនុស្សរាប់ពាន់នាក់ជុំវិញប្រទេស។ ក្នុងមួយសប្ដាហ៍សាលាមានការសិក្សាត្រឹមតែ ៥ថ្ងៃប៉ុណ្ណោះដោយមិនគិត ពីថ្ងៃសោរ៍និងអាទិត្យ។ កាលវិភាគសិក្សាវិញក៏មានការមមាញឹកជាអានេក ដោយចាប់ផ្ដើមពីម៉ោង ៨ព្រឹកដល់ម៉ោង ១២ថ្ងៃត្រង់ និងបន្តនៅម៉ោង ១រសៀលរហូតដល់ម៉ោង ៤ល្ងាច។
បពិតព្រះករុណា ព្រះមហាក្សត្រ ជាទីគោរពដ៏ខ្ពង់ខ្ពស់ សម្ដេច ទ្រង់ ឯកឧត្ដម លោកជំទាវ លោកឧកញ៉ា លោក លោកស្រី បងប្អូនប្រជាពលរដ្ឋ មន្ត្រីរាជការ លោកគ្រូ អ្នកគ្រូ និងក្មួយៗសិស្សានុសិស្សទាំងអស់
ជាទីបញ្ចប់ និងក្នុងឱកាសដ៏វិសេសវិសាលជាប្រវត្តិសាស្ត្រ ក្នុងការសម្ពោធសាលាអន្តរជាតិឡៃហ្គ័រ នៅទីក្រុងភ្នំពេញនេះ យើងខ្ញុំព្រះករុណា សូមថ្វាយព្រះរាជសព្ទសាធុការពរ បវរមហាប្រសើរថ្វាយព្រះករុណា ព្រះបាទសម្តេច ព្រះបរមនាថ នរោត្តម សីហមុនី ជាទីគោរពសក្ការៈដ៏ខ្ពង់ខ្ពស់បំផុត សូមទ្រង់ប្រកបដោយព្រះបរមសុខក្សេមក្សាន្ត ព្រះជន្មាយុយឺនយូរ ព្រះបញ្ញាញាណភ្លឺថ្លា ដើម្បីដឹកនាំព្រះរាជាណាចក្រកម្ពុជា ឆ្ពោះទៅកាន់ភាពរីកចម្រើន និងសម្បូរណ៍រុងរឿងតរៀងទៅ។ សូមថ្វាយប្រគេន និងជូនពរបវរប្រសើរសម្ដេចព្រះអង្គ ឯកឧត្ដម លោកជំទាវ លោកឧកញ៉ា លោកលោកស្រី សមាជិក សមាជិកា និងអង្គពិធីទាំងមូលសូមប្រកបដោយពុទ្ធពរទាំង៤ប្រការគឺ អាយុ វណ្ណៈ សុខៈ ពលៈជានិច្ចនិរន្តតរៀងទៅ។ សូមអរព្រះគុណ សូមអរគុណ
